ديوان غزل العشاق بعد منتصف الليل (( محمد رحيمة الطائي ))

[color=blue][center][b][size=18][/b][b]صاحبي الأنيق[/b][/color][color=blue]
[/color][color=blue][b]بقلم : حسن الخزاعي / شاعر وكاتب عراقي[/b][/color][/center]
[center][b]بين البشاشة والهشاشة حرف واحد ، استطاع صاحبي الانيق أن يطوع بذكائه الباهر المتفرد ويجعل من هذا الحرف بداية حرفة جديدة وأطلالة مشرقة للمستمع والقاريء من خلال دراما أنيسة وأنيقة ورقيقة لم نألفها سابقاً . .
بين ( يعني ) العربية والعراقية المذهلة والساحرة والتي يستنجد بها الشعراء والوزراء والفقراء ومقدموا البرامج لكي يعبروا عن موضوع ما أو قضية أو فكرة يريدون تقوية صورتها وتزيينها وسد فراغ المعاني .. هكذا أمسك الشاعر محمد رحيمة الطائي المفردة الضائعة ووضعها في مكانها المناسب فجاءت تراتيله كالمتوالية العددية .. فبين ( موعد حب ) و ( قيل وقال ) و ( طفت كل الشموع ) و ( اهلي مايردوني احبك ) و( ذكريات عاشق ) و ( غازليني ) و ( أنا والناس ) الى ( العين شافت ) .... وغيرها من القصائد تجد تلك الحميمية والألفة .. وشد الاعصاب حتى الاحتراق ..
تسعة عشرة حديقة يجبرك عبيرها أن تستمع اليه وما أجمل الأنسان أن يرى نفسه ويحس بأنفاسه وبنبضات قلبه المتلاحقة الخفاقة .. وما اجمل أن ترى للوعود ردود ..
غزل العشاق بعد منتصف الليل .. هذه المجموعة الشعرية والتي بين اياديكم .. طرز صفحاتها بكلمات مُذهبة بالأحساس .. ومفعمة بمشاعر الحب ..
(( اشلونچ يا أعز الناس عندي .. هو الگلب چم احبيبه عنده ..؟ )
هذا هو السؤال التي ستستمر تداعيات القصيدة .. ثم تتنامى بشكل متصاعد .. ويأتي الجواب ليضيف لعمق السؤال هدهدات العاشقة المعذبة ..
(( هزني الشوگ عالموعد اتانيك .. وأعد بيدي الدقايق وحده .. وحده ..!! )
الزمن هو الفاصل حيث فرض حيثيات البعد .. أنها محترقة .. متشظية ، من قساوة الساعات والدقائق التي تكون بطيئة وسلحفاتية على قلوب الملهوفين ..وعندما يلتقون تقفز من مآقي عيون الحبيبة دموع اللوعة فيتوسلها بعدم البكاء .. لأنه يحرقه .. ويؤذيه .. ثم أنه لايريد أن تحافظ هذه الحبيبة على تلك السحنة الجميلة ..
(( لاتبچين .. لا تبچين ..خايف على اخدودچ من دموع العين ..!! ))
تعال معي لنقرأ هذا الغزل الشفاف .. الذي يختصر مسافات الحزن والقلق والعتاب الداخلي الذي تفجره مفردات القصيدة الملتهبة ..
(( مرات احترگ .. حد ما اذوب .. انهار ..
وانتي ابنص ثلج مامرتچ حرگه .. ))
وبذات الانسانية ولغة اللوم المشتركة ..
(( من أيمرني اسمك اشتعل بركان ..
تره وادعت اعيونك مثلي ما تلگله .. )) _____________________________________________________[/b][/center]
[center][b]هذه الثقة المتميزة بالنفس (( مثلي ما تلگه )) ، وضعت نقاطها الابدية على حروف المشاعر .. حروف الروح العاشقة ، الولهانة ، والمؤمنة بصدق قولها .. انها لاتدعي بل تؤكد .. وتشير الى ذاتها المتفرد في الاخلاص التام ..
وتداهم العواصف ذلك العاشق الذي لايرضى حتى بمستحيلية قولها فينفجر :
(( اعتب وانقهر .. واحچي ابصلافه وياچ ..
بس معذور گلبي ايطالب ابحگه ..
اريدچ ذيچ انتي .. وماتهزچ ريح ..
واريدن صبرچ ايطول بعد خلگه .. ))
هنا يستصرخ كل عواطفها .. كل حواسها .. رغم أنه يعرف بأنها كالنخلة العريقة بالعنفوان .. كالجبل الذي لاتهزه الريح .. ويطالبها بصبر جديد مع ( الخلگ ) المتجدد ..
هذا هو العاشق والله .. وإلا لا يكون .. رغم كل الثقة بهذه المحبوبة الفردوسية يطالبها بالصبر الجميل ..
لا اريد أن اسرق منكم متعة القراءة ومتعة السفر الجميل بين هذا الغزل الشفاف والذي طرق اجمل ابوابه محمد رحيمة الطائي ، حتى الابواب السرية والمغلقة !!
تفيض كل قصائد هذا الديوان بتجربة شعرية جديدة .. وإني اراها تشير الى مرحلة لربما سيسير على هذا الطريق الكثير من المريدين ، وخصوصاً الشعراء الشباب .. وفعلاً قد انهض محمد رحيمة الطائي همم البعض بالكتابة بهذه الطريقة وبهذا الاسلوب الشفاف .. إنها قصائد تنبض بالمشاعر والاحاسيس واللهفة وعمق الآه الحبيسة ..
المجد للكلمة الجديدة والتجارب التي تفيض قناديل ملونة على طريق العشاق والمحبين ..
لقد ترك الشاعر الشفاف محمد رحيمة الطائي النهار ، لأن صوت البكاء في الليل ، اكثر ترديداً .. وتأثيراً بالروح ..
لا اريد ان اطيل أكثر ، فالغزل الذي قرأته في هذا الديوان يكاد يكون فريداً قي شفافيته وتعبيره الرومانسي .. وهذا ما كنت اعرفه عن الشاعر الطائي
إذاً سأترك لكم حرية الرحلة بين قصائد هذا الغزل والذي تستطيعون قراءته قبل وبعد منتصف الليل[/b][/center]
[b][/size][/b][/color][/center]

[center][b]موعد حب[/b][b][/b][/center]
[center][b]هو / اشلونچ يا أعز[/b][b]
الناس عندي ..
هو الگلب چم أحبيبه عنده .. [/b][/center]
[center][b]هي / هزني الشوگ[/b][b]
عالموعد اتانيك ..
وأعد بيدي الدقايق
وحده وحده ..
وحده .. اثنين ..
هاي الثالثة تروح ..
اتاني وصار هالموعد اشبعده
نمت حسبالي
اشوفك بالحلم جاي ..
وگلت دمعاتي احطهن وسط خده [/b][/center]
[center][b]هو / نمتي .. هنيالچ غفيتي[/b][b] ..
وآنة ليلي يمر على
عيوني صبح
الينيَّم وردة ويمسد عليها..
مو مثل ليلولي وينيم جرح .. !!
والغفه ابكلمة محنه ..
مو مثل الينام وبعينه ملح ..!! [/b][/center]
[center][b]هي / لا حبيبي[/b][b] ..
آنه هذا الليل من يمرني دمعة..
وحزن.. واشواگ .. وحنين
آنه عيني عليك ما بطل دمعها ..
تبچي ما تسكت العين .. [/b][/center]
[center][b]هو / لا .. لا تبچين[/b][b] ..
امسحي دمعتچ
وارجوچ لا تبچين ..
يل دمعچ جمر
وخدودچ احلى أورود ..
خايف على اخدودچ من دموع العين ..
لا تبچين ..
وردة وتحترگ ما تحمل النيران ..
يذبل كل ورگها وتستحي من الطين .. [/b][/center]
[center][b][color=red]هي /[/color][/b][b] وانت تگلي لا تبچين ..؟[/b][b]
مو عمري انتهى .. وايامي كلها أتروح ..
لو راح العمر متگلي اجيبه أمنين ..؟ [/b][/center]
[center][b][color=red]هو /[/color][/b][b] لا تبچين[/b][b] ..
المن بعد المن تسوه دمعه أتطيح ..
هو اشباقي بينا
ونحترگ كل حين ..
تعبنا القهر ممشى جزيرة وخوف ..
صار الماضي غلطه وچنه غلطانين !!
لا تبچين لو يسوه العمر يمكن بچينا اسنين .. [/b][/center]
[center][b][color=red]هي /[/color][/b][b] اشلون اتگلي لاتبچين[/b][b] .. [/b][/center]
[center][b][color=red]هو /[/color][/b][b] لا تبچين[/b][b] ..!! [/b][/center]
[center][b][color=red]هي /[/color][/b][b] تدري انت اليحب[/b][b]
ما يگدر اعله النار ..
ويا نار اللي بيَّه أتفزز الميتين ..
احتاج الدمع من ما اشوفك يوم ..
لأن يصبح عليَّ اليوم خمس سنين ..!!
حبيبي لخاطري ..
لا تبتعد ارجوك
ما احمل فراگك ..
تدري كلش زين .. [/b][/center]
[center][b][color=red]هو /[/color][/b][b] بس ارجوچ لاتبچين[/b][b] ..
خوفي آنه عليچ من الدمع والله ..
مرات الدمع
ياخذ حلاة العين ..
ويل كلچ ترافه ارجوچ لا تبچين ..[/b][/center]

[center][b][color=blue]قيل وقال[/color][/b]

[b][color=red]هو /[/color][/b][b] من جربت ليلچ[/b][b]
آنه ما مرتاح ..
لأن ليلچ غفه
وآنه أسهرت وحدي
ومن عديت عمرچ والله ما مرتاح ..
لان عمرچ ادموع
وتاكل بخدي..
ومن جربت صبرچ ..
حيل مامرتاح ..
لأن صبرچ جبان
ولايذ بسدي .. [color=red]هي /[/color] بس اسمحلي اگلك انت قاسي وياي ..
ومدري شبدلك وتغيرت ضدي ..
حبيتك صدك
ما چذبت عالروح ..
وبحبك صحيح
اتجاوزت حدي .. [color=red]هو /[/color] بس گالولي عنچ
انتي متحبين ..
اوصلولي سوالف
ماني سامعها
گالوا انتي صلفه
ومايهزچ شوگ ..
ورغم الحچي كله
وگلت تابعها
گالوا ماتوافي
وگالوا أتخونين ..
وگالوا حبها مر
وگلت اجرعها
حاچيني ابصراحة
وريحي گلبي وياچ ..
مو روحي مصيبة
اشلون اقنعها ؟؟

[/b]

[b][color=red]هي /[/color][/b][b] لا تاخذ حچيهم[/b][b]
كلشي تحچي الناس ..
هم عنك حچولي
اشكال يابو اشكال ..
گالوا ما يفيدچ ..
گلبه ويه اهواي ..
وچ بالچ يغرچ .. بالحچي الينگال..
بس حبيتك آنه
برغم كل الناس ..
واحس كل الحچولي .. وداعتك عذال .. [/b]

[b][color=red]هو /[/color][/b][b] من سألوني عنچ[/b][b]
خطف لوني الشوگ ..
ومبين عليَّ العشگ من لوني ..
ومدري اشبيَّه
رأسن ارتبك واحتار ..
لو مره عليچ الناس سألوني
يل عشتي بخيالي
من الصبح لليل ..
يل صرتي قضية
وساكنه اظنوني
مرات آنه اشوفچ
انتي مو وياي ..
وأگول وياي هيّ
اتچذب اعيوني
ومرات اختنگ
بالعبره حد الياس ..
وعلى ضيم اللي بيَّ
الناس حسدوني
وانتي وشرد اگلچ ......... [/b]

[b][color=red]هي /[/color][/b][b] گول .. لا تحتار[/b][b] ..
زعلني .. احبك
حد غلاة الروح ..
دمرني ابهواك
وزيد اجنوني ..
أنا بدونك حديقة
وما يمرها الماي ..
وافكر بيك انت
اشلون من دوني ؟؟ [/b][/center]

[center][b][color=blue]طفت كل الشموع[/color][/b][b][/b][/center]
[center][b][color=red]هو /[/color][/b][b] أنا وروحي .. وعذابي .. وحيرتي متانين[/b][b] ..
ما بين الأمل .. والياس .. والفرگه
لا مريتي بيه .. ولا اجيتي بطيف ..
بس الذكريات .. ولهفة الملگه ..
مرات احترگ .. حد ما اذوب .. انهار ..
وانتي بنص ثلج .. ما مرتچ حرگه ….. [/b][/center]
[center][b][color=red]هي /[/color] لا حبيبي .. وتدري آنه اهواك [/b][/center]
[center][b].. [/b][b]
ذوبني القهر .. والروح محترگه ..
من يمرني اسمك .. اشتعل بركان ..
تره وداعت عيونك .. مثلي ما تلگه ..[/b][/center]
[center][b] [color=red]هو /[/color] وأنا .. أبْعد المسافه .. وساعه من اشتاگ ..
اوصي الهوى البابچ .. من يجي يدگه ..
اعتب .. وانقهر .. واحچي بصلافة وياچ ..
بس معذور گلبي .. يطالب ابحگه ..
اريدچ ذيچ انتي .. وما تهزچ ريح ..
واريدن صبرچ ايطوّل بعد خلگه ..[/b][/center]
[center][b] [color=red]هي /[/color] آنه اصبر لحبك .. مثل صبر النوگ ..
ولو كل العمر .. بالصبر خلصته ..
لأن آني احبك .. تدري حد الموت ..
وغيرك ..
لاتظن الروح عاشگته ..
صديقاتي حسدني ..
وخوفي آني عليك ..
شافن حبي الك ..
بالروح شايلته ..
وحچيتلهن عليك ..
اتباهى بيك هواي ..
گلتلهن حبيبي ..
من الله طالبته ..
وبچيت وفاجئتهن ..
وانگلبت ادموع ..
وسألني وگلت ..
يومين ما شفته .. [/b][b]

[/center]
[/b][center][b][color=red]هو /[/color] وآنه البارحة ..
إبآخر نفس بالليل ..
سهران اويه همي ..
وما نمت ليلي ..
اجيتي اگبال عيني ..
وگمت افكر بيچ ..
واحس اهموم شوگج ..
هدمن حيلي ..
ها .. نامت .. بعدها ..
اشلون تگضي الليل ..
هي اهواي من الليل تشكيلي .. [/b][/center]
[center][b][color=red]هي /[/color] احچيلي حبيبي ..
وگول لي اشما صار ..
لتضم شي عليَّ ..
ابداعتي احچيلي .. [/b][/center]
[center][b][color=red]هو /[/color] شحچيلج ..؟
أنه ويه الليل صرنا اصحاب ..
اغنيله ابهمومي ابسلطنه عشاگ ..
وبطور السهر يگعد يغنيلي ..
وشحچيلج ..
طفت كل الشموع ..
وذابت ويه الليل ..
بس شمعة خيالچ .. بقت تضويلي .. [/b][/center]
[center][b][color=red]هي /[/color] بس متحبني أكثر مني ..
آنه اهواك ..
ورسمك ..
ما يروح ابلحظه عن عيني ..
شاغلني ابمنامي ..
ابصحوتي ..
ابممشاي ..
كل عمري صرت ..
وايامي .. واسنيني ..
حلمانة ابخيالك ..
واحچي سكته وياك
خليني .. بحلامي وياك خليني..


[/center]
[/b]

[center][b][color=blue]أهلي ما يردوني احبك[/color][/b][b][/b][/center]
[center][b][color=red]هي /[/color][/b][b] محتاره ويه روحي[/b][b] ..
وحيرتي ابصدري ..
وأموت من القهر .. بس انت ما تدري ..
كلما ارد اكلك .. احسب الف احساب ..
اخاف اتروح مني ..وينتهي عمري .. [/b][/center]
[center][b][color=red]هو /[/color] قلقتيني بكلامچ ..
گولي شنهو الصار ..
مامرتاح احس .. وكلي صاير نار ..
احچي اشصار .. گولي اشصار ...... [/b][/center]
[center][b][color=red]هي /[/color] أهلي ..[/b][/center]
[center][b] [color=red]هو /[/color] اشبيهم اهلچ ..؟ [/b][/center]
[center][b][color=red]هي /[/color] اهلي مايردوني احبك ..
وآنه احبك .. وحايره ابين اهلي وانته ..
واهلي ما يردوني اشوفك ..
يعني اموت بدونك انته ..
آنه ما اخفي عليك ..
النهار يمرني هم وآنه لعيونك صبرته ..
وليلي .. وليلي لوما الليل ..
چا هسه آني ميته ..[/b][/center]
[center][b] [color=red]هو /[/color] يوكتي ..
الردته كله وياي شو صار ..
اشضل عندك بعد رايد تسويه ..
أنا الگلبي جمر ..
وامكاسر ابنار ..
وهم شفت الجمر ..
واحد يچويه ..
دور اشماردت ..
يا وكتي تندار ..
وچفك من اطيح بحنه حنيه ..
ابكثر جروحي منك ..
هسة محتار .. جرح اللي يجي
بيا صفحه اخليه ..؟


[/center]
[/b][b][/b][center][b][color=red]هي /[/color] حبيبي اشبيك ..؟
لاتحتار ..
آنه وياك ابقى ..
وخلي كلشي يصير ..
يمنعوني ..
يحرموني ..
يبعدوني ..
اوصلك حمامة ..
بتك جنحها اتطير ..
ياأول عشگ ..
والروح هامت بيه ..
يل منك ابد ..
ماشفت كل تقصير ..
بس وياي اريدك ..تبقى ذاك فلان ..
لا تحسبني شرسه ..
ايخونك التقدير .. [/b][/center]
[center][b][color=red]هو /[/color] واهلچ ..؟
وآنه .. واهلي ..
واصدقائي .. اشلون ..؟
باچر شرد اگلهم لو يسألوني ..
عاندت اهلي كلهم من حچوا وياي ..
گالوا ولك نار وگلت عوفوني ..
باچر مِيت شامت يوگف اعله الباب ..
يا عذر الاجيبه ..
وبي يصدگوني ..
وانتي .. انتي اشلون ..؟ [/b][/center]
[center][b][color=red]هي /[/color] آنه اشلون ..
ما ادري ..
حرت واحتارت اظنوني ..


[/center]
[/b]

[center][b][color=blue]ذكريات عاشق[/color][/b][b][/b][/center]
[center][b][color=red]هو /[/color][/b][b] تتذكرين ..؟[/b][b]
چنه اصغار ..
چنت اتمنى اشوفچ ..
واحچي مره وياچ ..
وجنت ابچي ويه روحي ..
من اسمع ابطرواچ ..
وجنت گوه اصبر الروح ..
چنت خايف اكلچ ..
مره آنه اهواچ ..[/b][/center]
[center][b] [color=red]هي /[/color] وليش تخاف ..؟ [/b][/center]
[center][b][color=red]هو /[/color] مدري اشبيه ..
اخاف وارتبك .. واحتار
لو يجمعني دربي .. وبالصدف الگاچ ..
روحي اتروح كلها وياچ ..
عقلي يروح كله وياچ ..
اتعثر ابدربي ..
من انظر لممشاچ .. [/b][/center]
[center][b][color=red]هي /[/color] وآنه ابمستحى ..
وچنت ادري كلش زين ..
اباوع ارتباكك ..
وانظر لممشاك ..
بس شتريد اگلك .. يعني ما معقول ..
احس عيب من اگلك ..
هالگلب يهواك ..
ظليت ابسكوتي ..
وانتظر يايوم .. تجمعني الليالي ..
واحچي آنه وياك .. [/b][/center]
[center][b][color=red]هو /[/color] تتذكرين ..؟
چنت اجمع حروفي ابكل رسالة شوگ ..
واكتبلچ غزل ..
ما كاتبه لانسان ..
واحتار الگلوب ارسمها مدري اشلون ..
يا گلب الارسمه .. من العشگ خلصان ..
وتتذكرين ...........؟؟


[/center]
[/b][b][/b][center][b][color=red]هي/[/color] .... اي طبعا حبيبي ..
اشلون انسى الصار ..
وآنه وذكرياتي ..
امخاصمه النسيان .. [/b][/center]
[center][b][color=red]هو /[/color] تتذكرين ..؟
بايام امتحاني وچنت افكر بيچ ..
ردت انساچ لحظة ..
منفتح الدفتر ..
لاموني اصدقائي ..
وردت اصبر الروح ..
وبحبچ ضعيفه الروح ما تگدر ..
وتتذكرين ......؟؟[/b][/center]
[center][b] [color=red]هي /[/color] اي يحبيّبي اتذكر …..
مشه بينه العمر ..
واحنه ابحلاة النوم ..
شبسرعة كبرنه ..
ومشت حفنه اسنين ..
احس البارحه ..
من شفتك اول يوم ..
مشت بينا الليالي ..
وكلشي ممحسبين ..
لا حسبت بيه ..
ولانه احسب بيك ..
شوف الشيب اخذنا .. شننتظر بعدين ..؟ [/b][/center]
[center][b][color=red]هو /[/color] لتخافين ..
خليچ ابهواچ ..
العمر بعده ازغير ..
ومو أول بشر بالقافلة مشيبين ..



[/center]
[/b]

[center][b] [/b][/center]
[center][b][color=blue]غازليني[/color][/b][b][/b][/center]
[center][b][color=red]هو /[/color][/b][b] غازليني[/b][b] ..
ابعمري ما شايف غزل ....
وعوديني اعليچ ..
خل كل يوم اشوفچ ..
وعاتبيني ابيوم ..
اذا مرني الزعل ..
غازليني ..
شلون ما تردين احچي ..
طولي حيل ..
آنه اشو وياچ ما حس بالملل ..
غازلي ولا تستحين ..
ماظن ابيناتنا ايكون الخجل .. [/b][/center]
[center][b][color=red]هي /[/color] آنه احبك ..
آنه اموت اعليك ..
شكثر منها هاي ..؟
وآنه بس بحبك معلگه الأمل .. [/b][/center]
[center][b][color=red]هو /[/color] أي ..
خلي اسمع ..
راح اغمض عيني واسمع ..
خلي فكري ايتيه ..
ويه اجمل غزل ..
وخلي هذا الليل يحله ..
مثل ما تحلى الشفايف .. بالعسل .. [/b][/center]
[center][b][color=red]هي /[/color] يا حبيبي الماكو مثلك ..
آنه احبك ..
آنه گلبي من الزغر ..
بس انت حَبّك ..
وآنه طشيت العمر..
ريحان وورود اعله دربك ..
وآنه ما ازعل عليك ..
اعترفلك مرة وحده ازعلت ..
بس چنت ارد اجربك ..
وبيها آنه هواي والله تندمت ..
ليش آنه اعذبك ..



[/center]
[/b][b][/b][center][b][color=red]هو /[/color] وليش ردتي اتعذبيني ..
هو هيچ احنا اتفقنا اتعذبيني ..
يعني جربتي القساوة ..؟
امبينه هاي ..
وإلا ليش اتزعليني .. [/b][/center]
[center][b][color=red]هي /[/color] ردت اجربك .. [/b][/center]
[center][b][color=red]هو /[/color] وما لگيتي ..
غير بس الزعل ..
بيه اتجربيني ..؟ [/b][/center]
[center][b][color=red]هي /[/color] يا حبيبي ..
وداعتك ماعندي غيرك ..
يا قساوه ..؟؟
اقسي وي روحي ..
ولا اقسي عليك ..
ويا حبيبي .. اشعذبتني ..
ليل ونهار ..
آنه بس مشغوله بيك ..
آنه احبك حب خرافي ..
ومثل ما اشتهي انفاسي ..
آنه اشتهيك ..
ويوم بيه الما اشوفك ..
آنه اوصي الهوى يسلملي عليك .. [/b][/center]
[center][b][color=red]هو /[/color] وآنه من دونچ ..
ولا احس بالحياة ..
وظلمة هاي الدنيا تصبح ..
وانتي لتصدكين ارتاح ابغيابچ ..
اهمومي من بعدچ اسيوف ..
وبيَّ تجرح ..
ابقى مثل ام الوحيد ..
المات ابنها ..
اشلون ..
وبياوحشه تفرح ..؟




[/center]
[/b]

[center][b][color=blue]يفززني ضواك[/color][/b][b][/b][/center]
[center][b][color=red]هي /[/color][/b][b] يفززني ضواك ابليل لو جيت[/b][b] ..
مثل ظلمة وتجيها ابغفله شمعه ..
تعال وخل اشوفك مرت ايام ..
تعال وثوب هجرك يمي نزعه ..
گالولي نساچ وهسه مرتاح ..
وهواي اختلف وياچ وضعه .. [/b][/center]
[center][b][color=red]هو /[/color] آنه انساچ .. ؟
تعتقدين ..؟
المن هالدموع الكل وكت تجري ..
ما انساچ وعيونچ ..
اذا انساچ چا إلمن اون ..
واكتب ابشعري ..؟
يكولولچ نسى المحبوب ..
لكنهم شماته ..
وشافوا احنا اثنين ..
ماخذنا الهوى العذري .. [/b][/center]
[center][b][color=red]هي /[/color] آنه اعرف قصدهم ..
وگلت ما معقول ..
بس آنه وحياتك ..
ما نفذ صبري ..
رادوني اعوفك ..
گوه هاي الناس ..
يعني آنه من اعوفك ..
ينتهي عمري ..
بس مرات ..بيني وبين روحي ..
اعتب عليك اهواي ..
لأن تتعمد انت .. اتزيد ابقهري ..
يصير اسبوع مر ..
وما اشوفك بيه ..!؟
تدري انته بعذابي ..
لولا ما تدري ..[/b][b][/b][/center]
[center][b][color=red]هو /[/color] صار اسبوع ..
حقچ انتي ما تدرين ..
آنه النار بيه ..
وما طفت لحظه ..
ويحسدوني ابعذابي الناس ..
وآنه الگلب جامه ..
انكسر واتشظه ..
صدگ هاي الحياة احظوظ ..
كلمن بالهوى وحظه ..
وآنه الوكت ضدي ..
وانتي هم وياه ..
صار الحكم غصبن ..
ترضى ما ترضه .. [/b][/center]
[center][b][color=red]هي /[/color] بس حكم الوكت ..
لا زم نأمن بيه ..
يمرنه الحزن يوم ..
وبالفرح ومضه ..
ولا تحتار ..
فرغ همك ويه الليل ..
واشكيله الهموم وليلك اتعوضه .. [/b][/center]
[center][b][color=red]هو /[/color] لا ..
ما اشكي همي ..
الليل شنهو الليل ..؟
ما طخ راسي اله ..
وبحله ما ارضه ..





[/center]
[/b]

[center][b] [/b][/center]
[center][b][color=blue]فراق حسب الطلب[/color][/b][b][/b][/center]
[center][b][color=red]هي /[/color][/b][b] برغم ما آني احبك[/b][b] ..
لكن اشبيدي ..
حياتي وياك ماظن إلها تالي ..
شمعة العمر يگضي ..
ولازم أتذوب ..
يا شمعة البقت طول الليالي ..
خلينا انتفارگ والمضى انساه ..
وخل نلحگ عمرنا اعله التوالي .. [/b][/center]
[center][b][color=red]هو /[/color] هاي اشبيچ ..؟
شتكولين ..؟
تحچين ابصدك ..؟
لو انتي تتشاقين ..؟
آنه الجبت عمري ..
امعاند ويه الروح ..
ما حسبت بيچ ابلحظة تتغيرين ..
احچيلي اللي صار ..
اشبيچ ما تحچين ..؟
روحي اتخوني ..
ويمكن اكول اتخون ..
بس انتي ..
ولا حاسبلچ اتخونين ..
احچي .. اشبيچ ما تحچين ..؟
احچيلي الصدگ مو كافي تتشاقين .. [/b][/center]
[center][b][color=red]هي /[/color] صدگني آنه احبك ..
بس اخاف اعليك ..
صعبة آنه حياتي ..
وعايشه بنص هم ..
ما اريد آنه اشوفك تحترگ وياي ..
واصير آنه السبب من انت تتألم ..
ظروفي اتغيرت ..
خليك عني بعيد ..
يمكن لو بقيت وياي ..
تتندم .. [/b][b][/b][/center]
[center][b][color=red]هو /[/color] اتندم ..؟
محسوبة الليالي ..
وعمري محسوب ..
ووياي الحزن متگدر اگدار ..
جبت عمري ابقهر ..
وبدمع متعوب ..
شلم من ذكرياتي ..
وهنََّ طشار ..
انكسر سيفي ..
وأنه ويه الوكت مطلوب
مدري ابيا دقيقة..
ايداعي بالثار ..
خطيه اعيوني ..
بيها الدمع مصلوب ..
اخاف ابچي ابحرگتي ..
وتشتعل نار ..
يا رخص العمر ..
من اوله ايذوب .. [/b][/center]
[center][b][color=red]هي /[/color] اشبيدي آنه ..
الزمن خلاك تحتار ..
اشتعيش اعله القهر ..
متگلي چمدوب ..
وليا وكت تبقى وياي محتار .. [/b][/center]
[center][b][color=red]هو /[/color] بس ارضى آنه بيچ ابكل اهمومي وياچ ..
المفروض انتي منچ ما تعوفيني ..
يهون اللي جره ..
وبالصبر كلشي ايهون ..
وانتي اعلى الصبر ياما توصيني ..
ما چنت ارتجي ..
تحچيلي حچيچ هاذ ..
شجعيني اعله حبچ ..
انتي شجعيني ..





[/center]
[/b]

[center][b][color=blue]ما تدرين[/color][/b][b][/b][/center]
[center][b][color=red]هو /[/color][/b][b] گاعده[/b][b] ..
اشمدريچ بيه ..
عدل .. ميت ..
صاحي .. نايم ..
مبتلي .. لو گلبي خالي ..
وگاعده ..
اشمدريچ بيه ..
وآنه الف حسبه ..
تجي اتمر بخيالي ..
وگاعده ولا چنچ انتي ..
ولچ عذالي اجت .. تبچي اعلى حالي .. [/b][/center]
[center][b][color=red]هي /[/color] اشبيك ..؟
يا ستار .. احچيلي اللي صار ..
آنه حلمانه ..
وحلم موزين خوفني عليك ..
البارحه .. بالطيف .. چن احنه انتفارگ ..
وايدي مدري اشبيها ..
متلامس أديك ..
وچن عفتني ودنيا ظلمة ..
اوحدي اصيح ..
ياهو اليوصلني ليك ..
وبرعب فزيت .. وباسمك اصيح ..
البارحه لحد الصبح ..
مشغوله بيك .. [/b][/center]
[center][b][color=red]هو /[/color] وما دريتي ..؟ [/b][/center]
[center][b][color=red]هي /[/color] اشبيك ..؟ فهمني حبيبي .. [/b][/center]
[center][b][color=red]هو /[/color] ما تدرين ..؟
گلبي اشيحمل احزان ..
اتعب .. والتعب وياي متعوب ..
طحت .. بس يا وگعتي ..
ابين عدوان ..
وتلگوني الشماته .. وآنه مصيوب ..
غريب ويا غربتي..
المالها لسان ..
وترده الوكت وياي .. فدنوب ..

[/center]
[center][/b][b][/b][b][color=red]هي /[/color] غريب ..!!؟
غريب وآنه يمك ..؟ وشوكت هاي ..؟
اهن يومين مرن .. ما هن اكثر ..
شحال منبتعد ..
متشوفني اسبوع ..؟
وتبقى ويه الهموم ..
وبيهه تسهر .. [/b][/center]
[center][b][color=red]هو /[/color] طبعا ..
طبعا انتي ماتدرين ..
مرتاحه بحياتچ ..
وآنه اتعذب ..
اصبّح بالقهر .. واتمسّى وي الهموم ..
وبس ويه الدموع ..
آنه منريد ألعب ..
مكتوبه بحياتي .. والعمر لحظات ..
وآنه العمر كله ..
ويه التعب اتعب .. [/b][/center]
[center][b][color=red]هي /[/color] خير انشا الله ..
متشوف إلا الخير ..
يا أول حبيب بعمري صادفته ..
اتمنى آنه اشوفك ..
تضحك ومرتاح ..
ويا ربي ايتبدل ..
حلمي الشفته ..
وابقى وياك ..
لآخر نفس يالمحبوب ..
وعد من عندي ..
احبك ..
وعد قاطعته ..




[/center]
[/b]

[center][b] [/b][/center]
[center][b][color=blue]العين شافت[/color][/b][b][/b][/center]
[center][b][color=red]هي /[/color][/b][b] آنه وگلبي اسأل[/b][b] ..
والسؤال يطول ..
وما اعرف عليمن .. ابدي موضوعي ..
واون الليل كله .. واحترگ بالنار ..
واحس النار گوه اتجفف ادموعي ..
عفتني ابديره وحدي ..
ورحت انت بعيد ..
وذابن من غيابك .. صدگ اشموعي ..
يالبيك الگلب علمته من يهيد ..
الچمه ابجرح حتى يفزز اضلوعي ..
ولا تسأل عليه ولا چذب حنيت ..
ليش ..؟ انسيت ..؟ رَ ّجع ..
ولو گلبي وروح وين تروح ..
ما اعتب عليك آنه اخطأت .. واحچيت ..
[color=red]هو /[/color] من احچي ازعّل .. والصراحه اتريد ..
ومنين ابدي آنه وياچ سالفتي ..
اذا وي العشگ معركتي فضت يوم ..
اظن وي الوكت ماتفض معركتي ..
شعلتي النار بيه وچن ولا تدرين ..
چذبتي عليَّ اهواي چذبتي .. [/b][/center]
[center][b][color=red]هي /[/color] اچذب ...؟! [/b][/center]
[center][b][color=red]هو /[/color] اي نعم .. بس ما گلتلچ يوم ..
اعالج قهر گلبي بحسرتي وصمتي ..
بچيتي وصدگت.. لن گلبي طيب دوم ..
صدگ بيچ لمن عالهوى احلفتي ..
وشحچي وياچ ..؟
هو شضل بعد.. واحچي واخاف اعليه ..
هو آنه ويه روحي وما گعد بختي .. [/b][/center]
[center][b][color=red]هي /[/color] لا .. احچي البگلبك ..
بين المضموم ..
بعد عندك حچي.. التحتاجه ذاكرتي .. [/b][/center]
[center][b][color=red]هو /[/color] گتلچ آنه ازعّل مو حچي الينگال ..........

[/center]
[/b][b][/b][center][b][color=red]هي /[/color] .......... اي .. احچيلي بلله .. نشوف .... [/b][/center]
[center][b][color=red]هو /[/color] ها .. شفتي ..؟
بعد ماگلت كلشي ..
امبين ازعلتي .. [/b][/center]
[center][b][color=red]هي /[/color] لا .. احچي العليه ..
وسولف اشمتريد ..
من عندك اريد آنه افتهم قصتي .. [/b][/center]
[center][b][color=red]هو /[/color] تفتهمين ..؟
عود انتي بحياتچ كلشي معرفتي ..
حچولي اهواي ..
لكن چذبت من گال ..
بس العين شافت ..
هاي مشكلتي ..
شفتچ وي غيري ..
بضحكة تتشاقين ..
هم چذبي عليه ..
وگولي ابن عمتي ..!
ولچ شحچي وشسولف ..
والگلب شيصير ..
مو بيچ امنت ..
شو بالعجل خنتي ..
يا فشلة اگليبي ..
الصَّدگ بممشاچ ..
واختارچ حبيبه عمره بس انتي .. [/b][/center]
[center][b][color=red]هي /[/color] كافي ارجوك ..
افهم حبي الك ........... [/b][/center]
[center][b][color=red]هو /[/color] ....... لا ..
لا .. هم گبل گلتي ..
اخيراً هذا حدي ..
ونفترگ منا ..
ردتها وياچ عدله ..
وانتي ما ردتي ..




[/center]
[/b]

[center][b] [/b][/center]
[center][b][color=blue]الشك[/color][/b][b][/b][/center]
[center][b][color=red]هي /[/color][/b][b] صارلك فتره .. تغيرت اشأجاك ..؟؟[/b][b]
مومثل ماچنت في أول هواك ..
گلي شنهو الغيرك ..؟؟
وشاغلك ومحيرك ..؟؟
وحده غيري .. ايجوز ..؟!!
لتظم شي وراك .. [/b][/center]
[center][b][color=red]هو /[/color] انتي ........ [/b][/center]
[center][b][color=red]هي /[/color] ..... آني ..؟!! [/b][/center]
[center][b][color=red]هو /[/color] نعم .. انتي[/b][b] ..
انتي اطباعچ ابد مو مثل الاول ..
الشك وصل بيچ ويه روحچ ..
واحس كل حچيك تبدل ..
ليش ..؟؟
مو گتلچ عهد .. ابقى اعلى حبچ ..
گمتي متصدگين بيه ..
وصل بيچ الشك تسألين اصدقائي ..
بهذا طبعچ ياهو يقبل ..
نعم انتي .. انتي اطباعچ أبد مو مثل الأول .. [/b][/center]
[center][b][color=red]هي /[/color] يا حبيبي ..
آنه الف مرة گلتلك ما اشك ..
لا ما اشك .. بس آنه احبك ..
واليحب ايغار حتى من الهوه ..
العين هم اتخون مرات ابنظرها ..
والگلب لتقارنه ابصخره سوه ..
آنه يوم الما اشوفك .. الدنيا كلها اتصير ظلمه ..
وعيني متشوف الضوه ..
وك والله اغار اعليك حتى من الهوى ..
آنه لو بيدي ابوسط گلبي اضمك ..
وغير حبك .. گلبي بالدنيا اشحوه ..
واعترف صح آني اغار ..
ومن يهب الريح ويحّرك قميصك ..
يشتعل كل گلبي نار ..
وآنه معذوره .. لأن بس انت احبك ..
وألك بس انت الگلب سويته دار .. [/b][b][/b][/center]
[center][b]هو / وآنه هم مثلچ اغار ..
واشتعل بالغيرة واطفه ..
وآنه اشكال الجروح ابكلبي منچ ..
جروحي من تلچم تشفه ..
بس الف لچمه الاجت..
وجروحي ذيچ ..
وگفن ابنص گلبي وگفه ..
وآه يا طبعچ ..
ولا واحد يعرفه ..
مره اريد وياچ ..
اسوي الروح صلفه ..
ومره اريد الدمع ..
يبقى وما انشفه ..
ومره اكسر خاطرچ ..
بس ارد اشوفچ ..
وأرد ابينلچ فرق ..
بين المجافى وبين لهفه ..
ومره ........ [/b][/center]
[center][b]هي / ....... مره اريدك تبقى يمي ..
وآنه يمك ..
گلبي بس انت التعرفه ..




[/center]
[/b]

[center][b] [/b][/center]
[center][b][color=blue]عوفيني دربي صعب[/color][/b][b][/b][/center]
[center][b][color=red]هو /[/color][/b][b] تعبان من الوكت[/b][b] ..
وتعبان من روحي ..
والصخر يبچي ويون ..
لو يحمل اجروحي ..
تعبان گلبي خلص ..
وماضل بعد بالعمر .. بس ونتي .. ونوحي ..
عوفيني دربي صعب ..
خايف يجيسچ تعب .. عوفيني وروحي .. [/b][/center]
[center][b][color=red]هي /[/color] شتريد اعوفك تظن ..
اگدر على غيابك .. ؟
مو روحي شجرة صبر ..
وانزرعت ابابك ..
انظر گضاني القهر ..
وصبرت گوه الگلب ..
يتحمل اصوابك ..
مية الف موته متت ..
لاتعتب اعله الگلب ..
دمرني اعتابك .. [/b][/center]
[center][b][color=red]هو /[/color] خليني وحدي احترگ ..
وخل ناري بيَّ تشب ..
وبظيمي اريد ابتلي ..
ولوحدي امشي الدرب ..
مالچ ذنب بالجره ..
يم وكتي كل الذنب ..
هو الاخذ فرحتي ..
وبناره چوه الگلب ..
نادم انا اعله الوكت ..
ونادم على اللي صار ..
اشوازاني وآنه ابنفط ..
واتگربت للنار ..
ومحتار أنا ابدنيتي ..
أو وياچ هم محتار ..
واشجابرچ عالقهر ..
بيَّ آنه وكتي اندار ..
عوفيني اريح الچ ..
وخلي المضى تذكار .. [/b][b][/b][/center]
[center][b][color=red]هي /[/color] اشلون اعوف المضى ..
وياهو الينسيني ..
ولا آنه ارضى البعد ..
ولا روحي تنطيني ..
جيب اشمعندك صبر ..
بلكت يسليني ..
وهاك اخذ كل دمعي الك ..
هو اشبقى بعيني ..
وسفه اعله ذاك التعب ..
ما ترجع اسنيني ..
حسبالي توفي صدگ ..
وبحب توافيني ..
أشمدريني بعد الوفه ..
ابهجرك تجازيني ..




[/center]
[/b]

[center][b] [/b][/center]
[center][b][color=blue]علمني الزمن[/color][/b][b][/b][/center]
[center][b][color=red]هي /[/color][/b][b] ها .. شتريد ..؟[/b][b]
لا أرجوك .. لا تحرجني لا أرجوك ..
لا أرجوك .. لا تسألني لا أرجوك ..
ومنين ابتدي لو ردت احچي وياك ..
اشتريتك بالعمر .. وتروح للباعوك .. [/b][/center]
[center][b][color=red]هو /[/color] حياتي وآني اعرف كل درب امشيه ..
وآنه ارسم طريقي اشلون ما رايد ..
علمني الزمن صاحب الامشي وياه ..
ما بيعه ابثمن .. لو بدلّه بواحد ..
مو حلوه العناد ابين محبوبين ..
قاسي ايصير بيهم ياهو اليعاند ..
تدرين آنه احبچ بس غلطتي وياچ ..
صاير حبي الچ أزيد من الزايد .. [/b][/center]
[center][b][color=red]هي /[/color] غلطتك من تحبني ..
وتحچي هسه اوياي ..؟!!
يا حب شفته منك ..
بي تعيرني ..
تحملت العذاب ..
وما كلتلك يوم ..
واشكال الهموم اللي تعذبني ..
لسه اجروك هجرك ..
ما شفت لساع ..
وجاي اتريد هسه انوب تجرحني .. [/b][/center]
[center][b][color=red]هو /[/color] مشكورة ابشعورچ والحچي الگلتيه ..
بَيّن كلشي هسه وصدگت اظنوني ..
ياما اشگد سهرت وعاندت الايام ..
وبحبچ جميع الناس لامونـــي ..
اشكد مسكين آنه وصدگت الدمـــــــوع ..
وچذبتي انتي همي ودمعــــة اعيوني ..
ما اعتب عليچ العتب ويه الـــــــــــــــروح ..
اشو الاعتب عليهـــــــم هُمَ باعوني .. [/b][b][/b][/center]
[center][b][color=red]هي /[/color] ما بعتك أنه ..
وتعرفني كلش زين ..
لو اريد آنه ابيعك .. بعتك من اول ..
تحملت الحچي ..
اليوصلني من الناس ..
وبرغم الكلام ..
وگلبي متبدل ..
ماظن تلگه مثلي ..
وشوف هاي الناس ..
ياهو العله اطباعك ..
مثلي يتحمل ..
بس حظوظ هيه ..
وما اجت وياك ..
ادليك الدرب ..
وتگلي ما اندل ..

[/center]
[/b]

[center][b] [/b][/center]
[center][b][color=blue]أنا والناس[/color][/b][b][/b][/center]
[center][b][color=red]هو /[/color][/b][b] الناس رادوني اعوفچ[/b][b] ..
اشلون اعوفچ ..؟
وآنه وياچ ارتبطنا أبفد جرح ..
اشلون اعوفچ ..
وآنه اشوف احلامي بيچ ..
آنه ليل بدونچ انتي ..
الليل ياهو أيعرفه اذا مابي صبح ..
انتي دنيا ..
وثوبها مفصل على أهمومي ابترافه ..
آنه وين الگه .. مثل گلبچ سمح ..
وآني ادري ذنوب انتي ..
وياهو يتحمل خطيت اذنوبي بيچ ..
بس شسوي الگلب رادچ ..
صار بذنوبچ وكح ..
منين اجيب اعذار ..
تقنعني واعوفچ ..
منين ..؟ دَوري وياي ..
بس ما اظن تصح ..
وارد احلفچ .. بيش احلفچ ..
ابداعتي ..؟ ابداعت أعيوني ..؟ ابداعتي ..؟
ابداعت أعيونچ ..؟ تحبيني ..؟ [/b][/center]
[center][b][color=red]هي /[/color] وداعتك .. وداعت اعيونك ..
والله احبك ..
وآه لو تدري حبيبي ..
اشگد احبك ..
آنه لو بيدي ..
اشد گلبي ويه گلبك ..
وآه لو تدري حبيبي ..
اشگد احبك ..
برغم كل المر عليه ..
وادري دربي ما اظن فد يوم ..
يتلاگه ويه دربك ..
بس احبك ..
وليش ..؟ لا تسألني ليش ..
آنه ما أعرف حبيبي اشلون .. ؟
أو ليش آنه احبك .. [/b][b][/b][/center]
[center][b][color=red]هو /[/color] اشجابنه ..؟
وياهو الجمعنه ..
انتي وين ..؟ وآنه وين ..؟
ليش ما شفتچ گبل هاي السنين ..؟
چنتي وين ..؟
آنه خلصت العمر بالوحده أقاسي ..
وما لكيت ولا گلب يملك حنين ..
اسنيني فرهدها التعب ..
والعمر يمشي ..
وكل دقيقه من الفرح .. محسوبه دَيَن ..
چنتي وين ..؟
حتى هاي الوكت ماناصفني بيچ ..
هو لو ناصف .. گبل مدة تجين ..
وهسه اجيتيني ابوكت ..
بي گلبي جمرة ..
وآنه أخاف اعليچ ترفه وتنچوين .. [/b][/center]
[center][b][color=red]هي /[/color] يا حبيبي .. الما گلت گبلك حبيبي ..
اعيوني تسألني عليك ..
وروحي بس مشغوله بيك ..
وداعتك ..
لو خيروني
الجنه وسط اچفوف غيرك ..
وانت بس نار ابأديك .. آنه اعوف الدنيا كلها ..
والك بس انت اعتنيك ..
وليش ..؟ لا تسألني ليش ..
هي روحي ..
يمكن اتغافلني مرات وتجيك !!




[/center]
[/b]

[center][b][color=blue]سهرت الليل[/color][/b][b][/b][/center]
[center][b][color=red]هي /[/color][/b][b] سهرت الليل[/b][b] ..
وي دمعات العيون ..
افكر بيك ..
اگول يمرني يا يوم ..
الملم بالسوالف ..
كلها واشتاگ ..
مثل شوگ الطفل ..
بهواك مفطوم ..
تعال وخل اشوفك ..
گلبي محتام ..
امتلى .. ما بي مجال ابكثر الهموم ..
خلصني القهر ..
ما احمل افراگ ..
السهر دمرني ..
عيني محاربه النوم .. [/b][/center]
[center][b][color=red]هو /[/color] وآنه وداعتچ ..
ليل اليمر بيچ ..
ما غمضت عيني ..
ابلحظه وتنام ..
وحدچ بيچ افكر ..
والگلب نار ..
وعلى شوفة اعيونچ ..
گلبي محتام .. [/b][/center]
[center][b][color=red]هي /[/color] بس مر بيه باچر ..
فرح الروح ..
ونشف العين باچر ..
من تجيني ..
تعبني الصبر والصبر چمدوب ..
اطش اعيوني إلك ..
لو تعتنيني ..
امس غمضت عيني ..
وشفتك ابطيف ..
بقيت امغمضه ما فتحت عيني ..
علمني نسيانك ..
بلكت ارتاح ..
ولو ..
مو هين البينك وبيني .. [/b][b][/b][/center]
[center][b][color=red]هو /[/color] لو بيه آنه اعلمچ ..
علمت روحي ..
ولو عندي دوه ..
چا طابن اجروحي ..
آنه الليل كله ..
اتگالب ويه الروح ..
واخلصها ابونيني ..
ودمعتي .. ونوحي ..
يا اجمل حبيبه اتسهر اعيوني ..
ويااجمل حلم ومرافگ اظنوني ..
اشگد حاولوا ناس ورادوا انساچ ..
ومن گد ما احبچ تالي عافوني .. [/b][/center]
[center][b][color=red]هي /[/color] وآنه اشگد احبك ..
اكثر من الروح ..
وشلي ابدنياي غيرك ..
يا بعد روحي ..
حبيبي انت ..
واحبك ..
واصبر اعله النار ..
ومرخوص انت وحدك ..
تلچم اجروحي ..
احبك ............ [/b][/center]
[center][b][color=red]هو /[/color] وآنه احبچ .. يا اعز الناس ..
يا سلوه الروح .. البيها اتسله ..
اصبرلچ صبر .. حد ما أحس وفيت ..
واعوضچ خير عن ذاك التعب كله ..


[/center]
[/b]

[center][b] [/b][/center]
[center][b][color=blue]باردة أعصابك[/color][/b][b][/b][/center]
[center][b][color=red]هي /[/color][/b][b] باردة اعصابك[/b][b] ..
وانا المشتعله نار ..
انتظر ..
مليت والله الانتظار ..
لا إلك جيه واظل اتنطرك ..
فات موعدنه ..
وبعد ما اعذرك ..
بيا عذر تقنعني .. شيفيد اعتذار [/b][/center]
[center][b][color=red]هو /[/color] شوفي ..
احچيها ابصراحه ..
آنه ما متعود .. اخفي اللي يصير ..
آني أخرني الزمن گوه عليچ ..
والزمن ميحبني ..
لن آنه فقير ..
آني احس باشواگي اعذبچ ..
اني جنحاني ورق ..
والريح نار ..
واظن معذور من اگلچ ما اطير ..
وآنه احلم بالدفو ..
وحضن الحنان ..
لكن الايام ..
بالضد تستدير .. [/b][/center]
[center][b][color=red]هي /[/color] شوف اگلك ..
آنه حبيتك شخص بي كبرياء ..
وآنه ما ريدك تلبسني الحرير ..
رغم فقرك ..
انت اكبر من خيالي ..
هو بافعاله الرجل ..
يصبح چبير ..
المهم عندك وفاء ..
وغيره ..
واحساس وضمير ..
يا حبيبي ..
آنه اعيش وياك عالمر ..
آنه احبك ..
وابقى احبك للأخير .. [/b][b][/b][/center]
[center][b][color=red]هو /[/color] مرات الزمن ..
ما ينصف ويه الناس ..
واخاف من الزمن .. وياج يخذلني ..
امنيتي آنه اسعدچ ..
رغم فقر الحال ..
بس اشلون ..؟ وآنه الزمن ظالمني .. [/b][/center]
[center][b][color=red]هي /[/color] لتعيد الحچيته ارجوك آنه اهواك ..
وغيرك للأبد .. بالدنيا ميهمني ..
ما اگلك ابالغ ..
من اموت اعليك ..
بس الايام تمشي ..
وبيها جربني ..
اوفرلك سعادة ولو اعيش ابكوخ ..
لأن ادري آنه بيك ..
ابگلبك اتحبني ..
المهم .. خليني افرحك يا اعز الناس ..
ميلادي اجه ..
ولازم تشاركني .. [/b][/center]
[center][b][color=red]هو /[/color] عيد ميلادچ غنه ..
وشربت .. وكيك ..
وآنه عيدي ادموع ..
وهموم .. وقهر ..!!
وحاسبه لعمرچ ..
تره ايام وشهور ..
وآنه مدري العيد ..
مرني ابيا شهر ..!!
الليل لو ردتيه
يجيچ ابكل حنان ..
وآنه بيده الليل ..
جايبلي السهر ..
وانتي كل اليوم الفرح ..
يمچ يكون ..
وآنه مره الفرح ..
مر بيَّ وعبر ..
وانتي صبرچ ..
هو يتعنى ويجيچ ..
وآنه صبري من القهر ..
طگ .. وانفجر ..!!


[/center]
[/b]

[center][/center]
[center][b][color=blue]عشر أيام[/color][/b][/center]
[center][b][color=red]هي /[/color][/b][b] عشر تيام[/b][b] ..
مرن وانت ماجيت ..
تعال الحگلي .. گلبي من الهجر طاگ ..
تره الفرگه حبيبي ..
اتصير من يوم .. ويوم ايجرله يوم ..
ايصير الفراگ ..
اگول اليوم .. باچر .. بلكت تعود ..
عفيه اشخلگ عندك ..
لسه ماظاگ ..
جبتهه وياك سچه ..
وريل تعبان ..
خلص عمري اعله مودك ..
امشي عالراگ .. [/b][/center]
[center][b][color=red]هو /[/color] وأنه .. بنار احترگ .. وشيحمل النار ..
ما تطفه وحياتچ .. نار الاشواگ ..
وأنه بعيني مطر .. ما شالته غيوم ..
وبگلبي حمامه .. مشبگه شباگ .. [/b][/center]
[center][b][color=red]هي /[/color] تعال الصبر خلص ..
والحچي هواي ..
اخاف احچي ويه روحي ..
وحچيي ينباك ..
چنت تشتاگلي ابكل لحظه يهواي ..
اشو مرت ايام .. اشوكت تشتاگ ..؟ [/b][/center]
[center][b][color=red]هو/[/color] واضح من كلامچ ..
آنه ما مشتاگ ..
هاي ظنون كلها ..
ومو صحيح الظن ..
باقي وياي رسمچ ..
بالعيون ايبات ..
وسوالف محبتچ .. مني ما يرحن ..
انتي أول حبيبه العلمتني الشوگ ..
وعلى طرواچ ..
هاي اعيوني من يغفن ..
مو قصدي الفراگ .. منبتعد والله ..
بس هي الظروف وياي ما يصفن ..[/b][/center]
[center][b][color=red]هي /[/color] بظروفك تعتذرلي ..
وآنه بيه النار ..
صرت ويه الليالي ..
البيه ميرحمن ..
تدري ابشوفتك ..
ما يبقى هم بالروح ..
وثگال الهموم ..
بجيتك ايسهلن ..
عطشانه ..
الصبر شيسوي للعطشان ..
سواجي الصبر كلهن ..
بيه مَيرَوّن .. [/b][/center]
[center][b][color=red]هو /[/color] زين اشلون لو ابعد عليچ اشهور ..؟
ذني ايام عشرة ..
وصبرچ اتفرهد ..
صحيح آنه احبچ ..
بس ظروفي اتريد
وصدگيني الظروف ..
وياي تتعمد [/b][/center]
[center][b][color=red]هي /[/color] بس آنه بشر ..
والگلب حفنه اهموم ..
ونار البيه كبره ..
وما اظن تبرد ..
احچيها بصراحه ..
وآني ماشك بيك ..
مرات الظنون ..
اتهزني يمحمد ..


[/center]
[/b]

[center][b] [/b][/center]
[center][b][color=blue]لازم أسافر[/color][/b][b][/b][/center]
[center][b][color=red]هو /[/color][/b][b] ها يعمري[/b][b] ..
آنه يمكن راح اسافر .. [/b][/center]
[center][b][color=red]هي /[/color] اشلون ..؟
وتگلي ارد اسافر ..؟
يعني معناها تهاجر ..
ويعني معناها تروح ..
ويبقى گلبي لوحده حاير .. [/b][/center]
[center][b][color=red]هو /[/color] آني تعبني القلق ..
والانتظار ..
وگضت حفنه اسنين صابر ..
يومي هم بهم اخلصه ..
ونفس هذا اليوم باچر ..
ومن بعد ماشفت روحي ..
قررت .. لازم اسافر .. !! [/b][/center]
[center][b][color=red]هي /[/color] خليتك ابكيفك ..
ردت اشوف اشلون ..
اشو شفتك حبيبي ..
اعله البعد تگدر ..
گدرت الهجر ما اجه وياي الثوب ..
بس لايگ عليك ..
وجايبه امگدر ..
چم مرة آنه گتلك ..
گلبي ما مرتاح ..
وآنه اعرف حبيبي ..
ابگلبك اتغير ..
تجاملني ابچذب ..
واعرفها كلش زين ..
بس مجبورة اصدگ ..خايفه من الشر .. [/b][/center]
[center][b][color=red]هو /[/color] مرات الجبل .. يتمنى تل ايصير ..
حتى يشوف علوه ايعاين لروحــــــــه ..
ومرات الصخر .. يتمنى خلگ انسان ..
حتى يشوف ياهو اليحمل اجروحــه ..
ومرات السيوف .. اتمل عشگ الرگاب ..
تريد أتصير هيه ارگاب مذبوحـــه .. [/b][b][/b][/center]
[center][b][color=red]هي /[/color] امنتك عليه .. وگتلي عد عيناچ ..
تريد اتروح ..
مو آنه اتفقت وياك للوحه ..
النهر يروي العطاشه ..
وما بخل بالماي ..
بس مرات ..
يغدر غفله سابوحه ..
مو احنه سوه ..
واهمومنه بفد بيت ..
من تروح ..
كلمن يلتهي ابروحه .. [/b][/center]
[center][b][color=red]هو /[/color] اشلون التهي ابروحي ..
وما افكر بيچ ..
بالغربة اشألي..
وياهو اليسليني ..؟
اذا مو صورتچ ..
تنحط اگبال العين ..
مايحلى بشر ..
من دونچ ابعيني .. [/b][/center]
[center][b][color=red]هي /[/color] بس بالغربة تنسى ..
وكلشي ماضي ايصير ..
اخاف اتعوفني ..
وما بعد تتذكر ..
تنسى ايام حبك ..
كلها خاف اهناك ..
واجدامك ابگاع الغربة ..
تتبسمر ..
اخاف اعليك ..
لا .. لتروح ..
درب الغربه
وحشه وبيها تتعثر ..
وتنساني .. واضل وحدي .. افكر بيك ..
ادري اهناك تتغير



[/center]
[/b]

[center][b][color=blue]أبوذية ودارمي[/color][/b][b][/b][/center]
[center][b][color=red]هو : عليّ ثوب الونــــين اشكثـــــــر .. حالي[/color][/b][b][color=red]
شباب وهل شبت مـــــــــــــــن دون .. حالي
انشدچ على احوالچ مثــــــــــــــــــل .. حالي
طايــــــــح والهموم اتشيل بيـه [/color][/b][b]
[color=blue]هي : هموم هواك ما خلــــــــن .. علي حال[/color][color=blue]
فريضة وحبك مــــــــــــــــــــن الله .. علي حال
يالتنشد على حالـــــــــــــــــــي .. علي حال
شيفيد النشد عالصار بيـه [/color]
[color=red]هو : الج بس انتي گلبـــــــــــــــي .. ورجيته[/color][color=red]
ودمع العـــــــــين يمــــــــــــــــــــــچ .. ورجيته
ابتعد كلمــــــــــــــــــــن نخيتــــــه .. والرجيته
ولا واحد اجانـي وحن عليه [/color]
[color=blue]هي : رعيتك ليش گلبــــــــــك .. ما رعاني[/color][color=blue]
ويهمــــك فت دليلــــــــــــــــي .. وما رعاني
مره احبس بدمعــــــــــــــــي .. ومره اعاني
ومره اتطيح روحي ابين اديـــه

هي : هجرك ياولف صايــــــــــــر .. بلا حد
مثــــل سيف اليگص رگبــــــــــه .. بلا حد
رحت وآنه انتظـــر ترجــــــــــــــــع .. بالاحد
اجه الاحـــد ويمتـه اتعود اليــه [/color]
[color=red]هو : احد سچين صبري وچـــــن .. ولاحد[/color][color=red]
التفت وما شفــــت ربعــــــــــــي .. ولا حد
شچم سبت اليمــــــــر بيــــــــــه .. والاحد
اجي بس شوفتــچ تصعب عليه [/color]
[color=blue]هي : لتهم بالعمر خلصـــــان .. وحـــــده[/color][color=blue]
وأنا ضعني سرى بالهــــــــوى .. وحــــــده
حلت جنها بعيونــــــــــك غير .. وحــــــــده
وگمت لاتسأل ولاتمـــــر بيه [/color]
[color=red]هو : غيرچ ماحلى ابعينـــــــــي .. ولاطاب[/color][color=red]
ولا دونچ دخل گلبــــــــــــــــــــي .. ولاطاب
يجرحي وياچ ماهَّــــــــــــــــــــود .. ولاطاب
دم ينزف ولا تدريـن بيــه [/color]
[color=blue]هي : محبتك تجري وي روحــي .. ويدماي[/color][color=blue]
وعليك انشلت اعظامــــــــــــــي .. ويدماي
انچويت أبأيـــــــــد أنا نـــــــــــاري .. ويدماي
ولكن مـــــن يطابگهـن سويه [/color]
[color=red]هو : عليچ الروح راحــــــــــــت .. من يردهه[/color][color=red]
أوكيحه اهمومي صــــــــــــارت .. من يردهه
خطيه الروح ملـــــــــــــــــــــــت .. من يردهه
لأن بس الصبر لبس العليـه [/color]
[/b][b]__________________________________________[/b][/center]
[center][b][color=red]هو / آنه اللي عيني اعليچ واصل عماهـــــــــا[/color][/b][b][color=red]
اتحدى كل الناس تبچي أبچاهــــــــــــــــــــــــــا[/color][/b][/center]
[center][b][color=red] [/color][/b][b][color=blue]هي / وآنه الدموع اعليك ابچيها اشكـــــــــــــال[/color][/b][b][color=blue]
وتدري انت فص العين من وشلـت ســــــــــــال [/color][/b][/center]
[center][b][color=red]هو / صاحو عليَّ الناس واسمع ولا چــــــــــــن[/color][/b][b][color=red]
گالوا خذاه الشوگ هذا الولـــــــــــــد جــــــــــن[/color][/b][b] [/b][/center]
[center][b][color=blue]هي / لو تدري آنه اشلون مبتليه بيهــــــــــــم[/color][/b][b][color=blue]
عمدة من امر يحچون باسمــــك حچيهـــــــــــم [/color][/b][b][color=red][/color][/b][/center]
[center][b][color=red]هو / خل تحچي كل الناس بالچ تصــــــــــدگين[/color][/b][b][color=red]
ولا يبقى فكرچ دوم بيهم تفكريــــــــــــــــــــــــن[/color][/b][b] [color=blue][/color][/b][/center]
[center][b][color=blue]هي / ماصدگ الينگـــال بس بيـــــك اصـــــدگ[/color][/b][b][color=blue]
لن نبضي آنه وياك كـــــــل ثانيـــــــة ايــــــــدگ [/color][/b][/center]
[center][b][color=blue]هي / لو تدري حالي اشلون من بعدك اشصار[/color][/b][b][color=blue]
چا گلت عفيه اعليچ متحملـــــــــه النــــــــــــار [/color][/b][b][color=red][/color][/b][/center]
[center][b][color=red]هو / شوفي آنه حالي شلون من كثر الهموم[/color][/b][b][color=red]
بس رسم فوگ الگــاع سترنـــــي الهــــــــدوم[/color][/b][/center]
[center][b][color=red] [/color][color=blue]هي / اتمنى طيرة الروح واوصل واحاچيـــــــــك[/color][color=blue]
واگعد وحط الهمــــوم يمــــــــــك وابچيـــــــــــك
[/color]




[/center]
[/b]